Өспүрүмдөр арасында укук бузуулардын жана буллингдин алдын алуу

Бүгүн 53-жалпы орто билим берүү мектебинде (ЖОББМ) ИДН (Ички иштер органдарынын жаш өспүрүмдөр менен иштөө инспекциясы) жана анын жаш достору менен биргеликте мектеп окуучуларына рекетчилик, кылмыштуулук, зордук-зомбулук жана буллингдин кесепеттери тууралуу алдын алуу лекциялары өткөрүлдү.

Иш-чаранын жүрүшүндө окуучуларга мыйзам бузуулардын түрлөрү, алардын жоопкерчилиги жана кесепеттери тууралуу кеңири түшүндүрмөлөр берилди. Ошондой эле, өспүрүмдөрдү ар кандай терс көрүнүштөрдөн коргоо, укуктарын сактоо жана зомбулуктун алдын алуу боюнча пайдалуу кеңештер айтылды.

Айрыкча, буллинг (шылдыңдоо, коркутуу, басмырлоо) көйгөйүнө өзгөчө көңүл бурулуп, анын окуучулардын психологиясына жана билим алуусуна тийгизген терс таасири жөнүндө сөз болду. Окуучуларга бири-бирин сыйлоо, достук мамилени бекемдөө жана ар кандай зомбулукту токтотууда кайдыгер болбоо маанилүүлүгү түшүндүрүлдү.

Мындан тышкары, мектептин айланасында жайгашкан дүкөндөргө рейд жүргүзүлүп, сатуучуларга жашы жете элек өспүрүмдөргө зыяндуу заттарды (тамеки, спирттик ичимдиктер ж.б.) сатууга тыюу салынганы эскертилди. Бул аракеттер балдардын ден соолугун жана коопсуздугун камсыз кылуу, ошондой эле мыйзамдын талаптарын сактоо максатында ишке ашырылды.

Иш-чара өспүрүмдөр арасында укук бузуулардын жана буллингдин алдын алуу, ошондой эле мектепте жана анын айланасында коопсуз чөйрөнү түзүү багытында маанилүү кадам болуп саналат.